September 2020 kum ah Chin Heritage Foundation registration tuah rak thawk a si. January 2021 ah phung ning tein cozah nih 501(c) (3) a pekmi bu riantuannak a si. CHF cu Mission to Myanmar President & Foundation Church, Pastor Mark. A. Robinette, Rev. Hai Vung Lian (Pastor of Emmanuel Chin Baptist Church of Ohio), le Rev. Benjamin Sang Bawi (President of the Mid-America Chin Christian Fellowship & Pastor of the Carson Chin Baptist Church, Columbus Junction, Iowa) hna nih thawkmi a si.

CHF nih ai tinhmi cu Chin miphun dihlak nih Jesuh Khrih theihnak in an than khawhnak hnga, fimcawnnak, cauk chuahnak, cawnpiaknak le Chin miphun Khrihfa thawhkehnak kong le kan nunphung le biaknak hmaitlak in riantuantu bu asi lai.

A hlei khun in, Chinmi phun Khrihfa ah kan i thawknak kong le cauk hna tampi in tial khawh kan i zuam lai i Chinmi dihlak nih (Research) kan tuah khawhnak ding ah Rev. Carson chuahnak khua Columbus Junction, Iowa ah Chin Museum sak ding in timhtuah a si. Kan fa le nih kan Chin nunphung le tuanbia vialte zohkhawh ding le cawntlak in chiah kan i zuam lai. Chin museum nihcun US ah Chinmi phun dihlak le vawlei cung Chinmi dihlak miphun sinak(Chin Identity) hmuhsak ding in kan i zuam lai.

Chin miphun Khrihfabu Thawngtha a rak phurhtu Rev. Arthur le Laura Carson (American Baptist Church Missionaries), Dr. Erik Hjalmar East (Medical Doctor a rak tuan hmasa bik, zumtu hmasa bik tipilnak a rak petu), Rev. Robert G. Johnson, Rev. Johnson a fapa Richard le a fanu Ruth nih an cauk le American Baptist Chin Mission kong tharchuah ding ah lungtlinnak an kan pek cang bantuk can raulo ah, CHF website le Columbus Junction, Research Center ah chiah khawh kan zuam lai.

Chin Ram ah Missionaries hmasa hna an phak ka i, Chinmi phun nih kan hmanmi thilhlun pawl hna, kan khawmh chuahmah lio a si. Cun, Foundations of Grace Publishing nih Laura Hardin Carson nih USA ah a rakkir hnuah a tialmi cauk, “Pioneer Trials and Triumps,” a chuah cang i mitampi nih rak hmuh le rak rel a si cang. Tukum chung ah Dr. Erik H. East from his memoirs cauk a chuak lai. Atu hi Rev. Arthur le Laura Carson kong “Pioneer Trials,” cu tam deuh in kan chuah khawhnak lai kan i zuam lio a si. Cu lawng siloin Chin ram an rak phak ka hrawng ah an dirhmun le an hmantlak pawl zong kan khawmh cuahmah lio a si. Hi pawl kan hmuhchuah khawhmi cu Columbus Junction, Iowa Chin Museum ah chiah ding a si te lai.

Chin Heritage Foundation kong ah tampi tuanchuah ding le tinhmi tampi a um ko rih. Chin miphun dihlak nih internet in a silo ah a hmun ah rak lennak in zoh khawh ding ah tuanchuahmah lio a si.

Atu lio cu Kawlram kong kan ruah fate, kan mithli a tla peng. Pathian sin ah thla kan cam ko. Ralkap nih zalawnnak covo hramhram in mipi an chuhmi kong le COVID-19 kong kan miphun tampi harnak an tongmi cu thinlung a fak ko. CHF dirhnak kong ah can sau ngai te rak timhtuah a si cang i a tu cu tuanchuah khawh ding in a lam kip in i zuam cio a si.

Resources le membership kong kong cu website ah chiah khawh kan rak i zuam lai. Chin Heritage Foundation website ah rak leng te u law. Ruahnak cheuh nan duhmi a um ahcun nan kan chawnh khawh zungzal ko. CHF hi Pathian nih kan miphun caah thluachuah pe hram ko seh tiah thlaza kan cam.